2025/07/02ko prentsa-oharra

INFORMAZIOAREN ETA KOMUNIKAZIOAREN TEKNOLOGIEN SEKTOREAREN ESTATISTIKA - IKT. 2023

Euskal AEko Informazioaren eta Komunikazioaren Teknologien sektoreko negozio-zifra % 7,8 hazi zen 2023an

Sektore hori Euskal AEko ekonomiaren balio erantsiaren eta enpleguaren % 2,4 da

Eustaten datuen arabera, 2023an Euskal AEko Informazioaren eta Komunikazioaren Teknologien (IKT) sektorearen negozio-zifra 5.307 milioi eurokoa izan zen; hau da, % 7,8 igo zen aurreko urtearen aldean.

Bestalde, 2023an 2.852 enpresek osatu dute IKTen sektorea eta 27.754 lanpostu sortu dituzte; Euskal AEko ekonomia osoaren % 1,9 eta % 2,4, hurrenez hurren. Era berean, IKTen sektoreko enpresek sortutako 2.017 milioi euroko balio erantsia guztizkoaren % 2,4 izan da.

Aurreko urtearen aldean (2022), gora egin dute bai enpresa-kopuruak (% 1,3), bai enplegu okupatuak (% 4,2). 2010. urteaz geroztik (urte hori da eskuragarri dagoen serie historikoko lehen urtea), IKTen sektoreko enpresen kopurua % 36,4 hazi da eta lanpostu kopurua, berriz, % 24,9. Ekonomia osoarekiko pisu erlatiboak, ordea, ez du aldaketa esanguratsurik izan. 2010ean IKTen sektorea Euskal AEko ekonomia osoaren BPGaren % 2,7 zen eta 2023an, aldiz, % 2,4. Enpleguari dagokionez, 2010ean enpleguaren pisua % 2,1ekoa izan zen, 2023an baino hiru hamarren gutxiago (% 2,4).

IKTen sektoreko enpresek sektore guztiak kontuan hartuta baino I+G+B jarduera gehiago egiten dituzte

IKTen sektorea Euskal AEko enpresa guztien % 1,9 baino ez da. Hala ere, I+G egiten duten enpresen % 14,9 biltzen du eta, 138,9 milioi eurorekin, enpresa-sektorearen barneko I+Gko gastu osoaren % 9,0 hartzen du.

Gainera, sektore guztiak kontuan hartuta, barneko I+G jarduerak enpresen % 1,0k bakarrik egiten ditu; IKTen sektoreko enpresetan, berriz, ehuneko hori % 8,0ra iristen da.

2023an, sektore horretan I+Gean 1.931 pertsonak egin zuten lan "dedikazio osoko baliokidetzan" eta horien artean % 24,4 (471) emakumeak izan ziren. IKTen sektorean I+Gean lan egiten duten 1.931 pertsona horiek I+Gean lan egiten duten enpresen sektoreko langileen % 11,7 hartzen dute. I+Geko langile guztiekin alderatuz gero, % 8,3 dira.

Berrikuntzari dagokionez, I+Gean gertatzen den bezala, alde nabarmenak daude sektore guztien eta IKTen sektorearen artean. Hala, 2023an, IKTen sektoreko 10 langile edo gehiagoko establezimenduen % 58,3 berritzaileak izan ziren, sektore guztien kasuan, aldiz, % 38,4.

Berrikuntza-jardueretan egindako gastuari dagokionez, IKT establezimenduek 438,9 milioi euro bideratu zituzten, sektore guztien gastuaren % 12,3. Gastu horretatik, 370,2 milioi 10 langile edo gehiagoko establezimenduei dagozkie, hau da, tamaina horretako enpresek gastatutako guztiaren % 11,8.

IKTen sektoreak, gastura bideratzen dituen zifrek adierazten duten bezala, eta sektoreen guztizkoarekin alderatuta, negozio-zifrarekiko baliabide gehiago ere bideratu zituen l+G+Bra, bai berrikuntzarako bai barneko I+Gerako (berrikuntzako eta barneko I+Geko intentsitate-ratioak). Zehazki, berrikuntzaren intentsitatea % 5,8koa izan da sektore horretan eta % 1,7koa, berriz, sektore ekonomiko guztietan. Barneko I+Gren kasuan, ratioa % 1,7koa da IKTen sektorean eta % 0,9koa guztizkoan.

Merkataritza elektronikoa sektore guztietan baino orokortuago dago IKTen sektorean

IKT teknologien erabilera oso hedatuta dago sektore honetako enpresetan eta Internet enpresen % 99,7ra iristen da; sektore guztietan, berriz, enpresen % 96,0ra. Era berean, IKTen sektorean enpresen % 74,5ek dauka webgunea eta sektore guztietan, aldiz, % 59,7k.

Merkataritza elektronikoa ere gainerako sektoreetan baino garatuago dago. IKTen sektorean bide horren bidez erosi zuten establezimenduak % 72,1 izan ziren eta salmentak egin zituztenak % 14,4. Sektore guztietan, aldiz, % 26,3 eta % 8,8 izan ziren, hurrenez hurren.

Horren ondorioz, 2023an IKT establezimenduen % 73,7k merkataritza elektronikoa zuen eta sektore guztietan % 29,2k.

Azkenik, IKTen sektoreak ondasunen kanpo-merkataritzan duen eragina ez da oso esanguratsua: esportazioak 440,3 milioi euro izan ziren (32.750,4 milioi izan ziren guztira) eta inportazioak 606,7 milioi euro (26.944,2 milioi inportazio guztira); hau da, % 1,3 eta % 2,3, hurrenez hurren.

Truke horietarako eta esportazioetarako gehien erabiltzen diren produktuen artean honako hauek nabarmentzen dira: IKTen beste produktu batzuk (% 39,3), Osagai elektronikoak (% 37,6) eta Telekomunikazio-ekipoak (% 10,6). Inportazioetan: Osagai elektronikoak (% 36,6), IKTen beste produktu batzuk (% 33,4) eta Telekomunikazio-ekipoak (% 12,5).

Laburbilduz, 2023an, Euskal AEko Informazioaren eta Komunikazioaren Teknologien (IKT) sektorearen negozio-zifra % 7,8 hazi zen eta 5.307 milioi eurora iritsi zen. Sektore horrek % 2,4ko ekarpena egiten dio euskal ekonomiaren balio erantsiari eta enpleguari.

Gainera, Euskal AEko enpresa guztien % 1,9 bakarrik izanik, I+Geko jarduerak dituzten enpresen % 14,9 biltzen du, barneko I+Gko gastu osoaren % 9,0 gauzatzen du eta berrikuntza-jardueretan egiten duen gastua, sektore guztien gastuaren % 12,3 da.

IKTen eta merkataritza elektronikoaren erabilera hedatuago dago beste sektore batzuetan baino, bereziki webgunea edukitzean (sektore horretan % 74,5ek du webgunea eta sektore guztietan % 59,7k).

Azkenik, kanpo-merkataritzan eragin mugatua badu ere, esportazioak (440,3 milioi) eta inportazioak (606,7 milioi) IKT produktuetan, osagai elektronikoetan eta telekomunikazio-ekipoetan oinarritzen dira.

Ohar metodologikoa:

Informazioaren eta komunikazioaren teknologien garapenarekin, ekoizpenarekin, merkaturatzearekin eta erabilera intentsiboarekin lotutako jarduera nagusia duten manufaktura-industriek eta zerbitzu-industriek osatzen dute IKT sektorea, eta, ezaugarri gisa, berrikuntzan, aurrerapen teknologikoan eta produktibitatean tasa handiak ditu; beraz, eragin handia du jarduera ekonomikoan. Eustaten webgunea. Metodologia-fitxa: IKTen sektorea

.

Informazio gehiago:

Eustat - Euskal Estatistika Erakundea / Instituto Vasco de Estadística
Donostia kalea 1, 01010 Vitoria-Gasteiz
Prentsa-zerbitzua: servicioprensa@eustat.es Tel: 945 01 75 62